Louis Briffa

Siltiet mill-istudju ta’ Charles Briffa
Jinċana l-Ħsieb

F’din it-taqsima Louis Briffa jittratta s-suġġetti tal-poeżija, tal-poeta, u tal-lingwa fil-poeżija. F’Għajnejn il-Poeta, Sejħa lill-Kelma, Karikatura, Frammenti (1), u Frammenti (2) jiflu l-ispirtu ta’ poeta; L-Imgħallem tas-Sengħa u La Jiġu l-Awdituri jiddeskrivu s-sengħa ta’ poeta; u Sirena u Jitkellem Ilsienna jindirizzaw l-għodda ewlenija ta’ poeta… F’dawn il-poeżiji naraw lill-bniedem ifittex ġo fih innifsu u dak li jsib ikun oriġinali għax kull individwu huwa kemm parti min-natura u kemm fl-istess ħin ħlejqa unika. Imma huwa oriġinali wkoll għax in-natura u l-kultura li jagħmel parti minnhom jinbidlu l-ħin kollu.

…Hekk jidher dan il-kittieb quddiemi minn dawn il-poeżiji f’din it-taqsima: bħala mgħallem tas-sengħa li l-lingwa ordinarja jrid jagħtiha saħħa artistika. Fih tidher ħidma li timpenja lill-moħħ u lill-immaġinazzjoni, imma hemm tħassib biex jiddeċiedi x’inhu importanti biżżejjed li jista’ jinkiteb. Dawn il-ftit poeżiji juru li ma tistax tifred lill-bniedem li jbati minn dak li joħloq (bħalma ma tistax tifred il-warda mil-lewn), u l-qarrej jifhem li t-tieni jiddependi mill-ewwel.

…Il-poeżiji ta’ Louis Briffa għandhom ħabta jsibu mod kif ikunu aċċessibbli u impenjattivi fl-istess ħin. Iressqilna quddiemna s-sentimenti tagħna billi jurina s-sentimenti tiegħu għax jifhem li l-poeżija tibda bis-sentimenti u l-perċezzjoni tal-poeta, u dawn tipprova tgħaddihom lill-qarrej. Hija strument ta’ trasferenza, ukoll jekk is-sentimenti u l-perċezzjoni fil-qarrej ikunu kemxejn differenti. Fi Briffa l-immaġinazzjoni titħallat mal-kummenti serji u jinqeda b’varjetà ta’ forom biex joħloq l-effetti li jkollu bżonn. Il-ħidma ta’ l-istilistika għandha tinkludi l-interess fil-mod kif il-lingwa tagħmel il-poeżija taħdem. Briffa jinqeda bi strateġiji poetiċi (li jiġbru fi ħdanhom il-metafora, l-anafora, il-paralleliżmu, ir-ritmu, ir-rima u oħrajn) li hu jħoss li għandhom ikunu parti mill-għodda tas-sengħa u bihom irid jinċana l-lingwa ħalli dak li juri, minkejja li jkun familjari, jidher donnu mhux familjari.

Trackback URI | Comments RSS