|
DIRGLA
1
Bħal bronż maħlul
fil-forom li jeħtieġ min imexxina
aħna…
Atleti ta’ l-imwieġ
għax kontra l-kurrent naqdfu
jo żwiemel imżeffnin fuq l-isplussivi
fir-ċirklu tal-politka mdewda
aħna…
2
L-isparpaljar
virtù
li kollha għandna nxiddu.
Ipnotizzat kulħadd.
Kulħadd isoff mill-banek
– bħal ferħ bla qies ta’ naħal
fuq ward bla reżistenza –
għasel ta’ liri/ewro għall-pjaċir
biex wara nsoffuh
nerġgħu
bl-imgħax li jkollna nħallsu.
’Mma d-dejn l-aqwa ċertezza�
li aħna poplu ħaj
u nħobbu ngħixu!
3
Tibqa’ l-opzjoni komda
li nbaħħru kisknijiet lejn Abukir
u nogħdsu ’l isfel,
ngħarrxu sew il-qiegħ
ta’ port taparsi tagħna.
Qatigħ jgħinuna f’dit-tfittxija sagra
il-fosos bl-elettroni tal-qarnit
ċerkjati b’torċ l-għaddasa.
Ċagħqija sat-tarfnett
ngħarbluha f’leħħa
għal kulma jleqq;
bir-rizzi kollhom raġġi
u l-grottli xjuħ
ostaġġi
ma jibqgħux
u għal rashom preċiż jaqgħu
minċotti
fejn jipprovdi ferq il-blat.
Fi xkejjer żgħar l-ingotti�
mal-bżieżaq ta’ l-ossiġnu
dritt għall-wiċċ
tal-baħar Eġizzjan
minn għelt id-djun jifduna:
bi mħatra ġidi npoġġi
bla xaqq biża’
għax din is-soluzzjoni
ssostanzjajtha!
4
Tiġieġa ddissussata dal-pajjiż
li flok il-mili jfuħ
b’tat-tjur marrara miżża
l-Ewropa sous-chef prima
nefħitu biss għall-għajn.
L-Ewropa f’karestija
tort ta’ dragun grottesk
ibierek lill-Orjent
u l-ajkla tal-ftaħir amerikana
tisseqqer
mingħajr xaba’
fuq ta’ l-Islam il-bjar
iroddu d-deheb maħmuġ!
5
Inkapsulata d-dagħwa
tat-tradiment fis-swar
stuprati b’asfalt jaħraq u biż-żrar
għar-ring road f’ġieħ is-sewwa u l-progress.
Mas-swar ta’ Marsamxett
nimmasturbaw.
Mas-swar f’ritratt sfukat�
għal min ma fassalx tajjeb il-futur
għax baqa’ qatt ma ra
fil-glorja tal-passat
il-passi żgħar u kbar li ridna nsegwu.
6
Mhux bl-abjad tal-ġarġir
isaħħar Wied id-Dis
’mma b’ġenn t’appartamenti
skond kif tarahom
jogħlew
biex jostru l-blat inixxi demm is-sekli.
7
Isaltan jibqa’ l-ġgant lebbruż tal-Magħtab
b’sigarru jinten pesti qalb l-akaċja
inixxef il-busbies u l-isturnell;
u jtaqqal b’għeja stramba
petriċa ’l barra ġmielha mill-iskolji.
8
Sidien l-għelieqi verġni f’Tal-Virtù
qalu li ssabbru;
bix-Xagħra l-Ħamra l-boċċa qrib il-likk għadhom kif ħabbru
b’pubbliċit okkulta
xandara ma jiswewx daqs tebaq fwiedhom.
It-toqob mingħajr għadd li tippossiedi
dix-xehwa b’dijametru
ta’ ġobna tfuħ tat-toqba.
Espert ħalef li kienet
mill-bidunett fil-pjani ta’ Jaħwe
għal-logħob tal-golf u l-koros
ħa l-għorba sbieħ ikiddu l-art ħawlija,
bl-istikek jimmiraw
għal sorm l-irġiel tar-raba’.
9
Poeta
jien
niftakar fl-antenati.
Fl-emblemi tal-ħaddiema rassenjati
u l-korla fil-baċiri tal-kuntrarju
jikkastigaw bla tort ulied is-sengħa.
Mal-blat jiskorċa l-mielaħ
sa spnar joforqu ġbejna tal-ħalib…�
mal-makkinarju jerħi żejt qadim
fiż-żoni fejn jinħalbu…
mar-ragħad ikebbes b’qilla l-istaġun
maħtur lill-poxt padrun qaddis tar-raħal
jinħlew
nimmaġinahom �
għexieren ta’ snin oħra.
U xejn li xejn, Eloi, ma nista’ nagħmel!
10
Meta
fil-qaleb
ta’ moħħna l-ħaddiema
jisplodi l-ekwinozju
il-verit ma tkunx aktar sfukata.
Għall-gżira tagħna sfajra u laċerata
biżżejjed
jekk inqumu u nxappulha
tajjâr bl-ispirtu kiesaħ tal-fejqan.
Biżżejjed
jekk bħala aħwa
insaħħu l-edifiċju
u fuqu nqabbdu ċ-ċippu
bin-nar repubblikan.
11
Dal-lejl jien kelli
ħolma.
Ma’ marti bdejt interraq
din l-art fittizja tagħna
b’rix aħmar nieżel bandla għal fuq rasna.
Madwarna l-baħħ,
bibien bla serratura
u l-kesħa ta’ l-għajnejn wara l-purtelli.
Mir-rix insawru maskra Venezjana
ħa nkunu bħall-oħrajn
fil-lejl tal-fallu.
Noħlomna naqsmu s-sala
bir-rix jostorna waqt iż-żfin fil-ballu.
Aħmar dar-rix sabiħ u soċjalista
li xegħel ħajjitna griża
bin-nar etern tal-mit.
12
Hawn jien, fl-anfiteatru tiegħi -
poeta-dissettur:
mhux l-isdra żgħar tat-tjur miżgħud puċpieċ u sriep
u fniek ta’ l-Indi
għażilt li nisfrondalkom.
Lezzjoni mingħajr lewn l-anatomija
(bħall-iġsma li qattajt)
li llum, titqanna jkollha,
fuq xkafef b’tubi dojod skond id-daqs
u lewn il-kimika.
Pajjiżna llum ftaqtilkom,
titmeżmżux!
Inevitabbli l-qsim li kelli
nħalli
ta’ l-għodda tqum tas-sengħa
fuq ġisem l-art li nħobb.
Mard serju li laqatha;
u dam ma deher jo ħareġ.
Bħal twerdin kbir
ta’ magna t’ajruplan itir fil-baxx
jew maremoto qawwi
skussjatha sew dil-kriżi
sa sefgħet bla taf kif f’xifer il-gwaj.
Qaxqxuha l-parassiti ta’ qaddejja
u meta ġiet fil-bżonn
ħallewha tofrok għaxja;
u duwa dik li huma ma ridux
ja vili sqewha!
J’anġli li ngħożż, ta’ fibra!
Skussjaw Kastilja f’sakra ta’ bla ġieħ!
Il-laptop tad-destin aħfnuh f’idejkom
u ddisinjaw futur
imsejjes fuq ix-xogħol,
fuq il-valuri…
u la ċċedux pass wieħed
sakemm isiru rmied
dal-ħatba li jinħarqu għall-poter:
missirijietkom!
13
Dar Malta fi Brussell
timlielna żaqqna vojta bl-apatija.
Taħt shot t’anestesija
nissogra ngħid għal min imexxi l-gżira bla riżorsi
stronkat bħal Ċesri minn ta’ ġewwa stess;
biex jaqta’ d-dejn ossess
u b’diretturi�
li b’buri jrieġu mżarġna u mingħajr snien
battalja kontra t-telqa
u t-tberbiq.
14
Biex piż daż-żmien bla kont, ta’ riċessjoni…
l-iżbalji madornali tal-passat…
l-amputazzjoni mgħaġġla
tal-ħolm abjad preċett
għal min emmen bis-sħiħ
fil-fasla ta’ pajjiż
li qatt ma tlesta…�
u biex das-sensji jvenvnu
bħal ballistri
lill-gajjijiet sinċiera
mil-lant tal-ħidma wtiqa
itaffu mqar xi ftit…
narahom inewlu l-loqom
lill-fratellanzi ġodda ta’ l-ilsiera.
|
