|
IMĦABBA KLANDESTINA DIN
Ħabbejtek, anki jekk dhert ftit musfara
fi spazju bejn nofs linja laterali
ġo mappa b’tarf mikul, qatigħ imgħabbra,
f’senduq mistur minn għajn il-klieb furbani.
Kont jiena l-ammirall miġnun biżżejjed
li ftaħt il-mappa u flejt sa l-iċken tikka
fi blu li minnu għext u tani ismi.
Sa qist reqqien b’kumpassi tqal u msadda;
salpajt imnerveż fost il-ġenn taċ-ċorma.
B’passjoni u ferħ għajjatt: “Fuq l-arbli l-aħwa.
Ħolluh il-qlugħ ħa r-riħ jeħdilna ħsiebu.
Torqodx, tmunier! Amrilhom jerfgħu l-ankra.
Mhux iġfna rrid ’mma graw ħafif, felħani
iduq il-melħ f’titjirtu fuq wiċċ l-ilma.
Fil-mhux magħruf se nbaħħru. Spedizzjoni
mill-aktar rari din. Ta’ talb fis-sogru
u t’hena jħoll. T’intriċċi u logħ’b b’din qalbi
imnaqqra bħas-sellieħ mit-tartarella.”
Armajn dan moħħi xjaħli jikkontempla
l-imħabba u d-distanza f’nofs ta’ baħar.
Għejieli kmieni wisq. M’għadux radjanti.
(O kemm jidwuli sbieħ… Nistħajjel f’leħħa
ma nafx kemm-il kanun fi sħaba tixgħel,
- f’salut heżżież f’dil-mewt komuni tiegħi –
tat-tromba d-daqq, tperpir bnadar mezz’asta…)
Hekk f’bokket għar l-imrajjen jibdel fommi
u ’l żaqqi f’marqad komdu għall-imħara
sa mxejjen nagħqad tond fi brim is-sikka
mixgħul bħalkieku b’lampi tal-merkurju.
Żagħżugħa ta’ l-imwieġ għax ħlift li nsibek
u ngħallmek l-għerf li forsi x-xjuħ għallmuni
u npoġġi fuq ilsienek krib iċ-ċiefa
inbdiltli f’ragħwa u ċpar. Minn fuq il-gverta
bl-oktant marsus m’għajnejja nikkalkula
kemm huma fl-għoli x-xemx u l-kwiekeb nieżla
f’xulxin, f’sema karus. Sa l-uffiċjali
fid-deffa. Nhar u lejl ħdejn l-istrumenti.
Sal-baħri mtarraf f’qoffet il-majjistru
jgħarrafni xi jkun ra, b’tant ħeġġa u ħrara.
Biex niksbek ġidi tlift u l-iprem prejjeż!
Żmien ilu tlabt ħa x-xjaten xjuħ u mherwla
taħt pettijietek jeħlu għalenija.
’Mma x-xjaten ma mitux u hawn jinsabu
u demmhom f’dad-dawran ma’ djul il-flotta.
Fuq mewġa nvara s-sejħa nobbli tiegħi,
bil-baħar jofrogħ, b’ħolmti tgħib għal dejjem.
Fil-menti l-pass kajman fuq ġismek niedi,
il-fjuri tar-rebbiegħa jmellsu ħdanek,
ix-xemx tisriġli minn għajnejk sewdiena.
Int f’qalbi ħlist farfett b’gallun imdieheb,
fit-telfa nfidtli dell is-solitudni
u mrieżaq safja ħtartli bi gwardjani.
Ta’ bewstek it-tifkira f’maktur mitni
ġo ħobbi – miżmum b’qima, b’għożża kbira –
daqs xewket traċna żżoqqni bil-velenu.
B’suppervja ndawwar l-iġfna f’rotta ġdida.
F’tislita nisfa ma’ kurrenti mqella
sa nittradixxi r-riħ u d-dlam u l-ħalel
u b’riedet irġuliti, b’dehni, b’sabri
nisforza u nidħol fil-menqiet tal-ħniena.
Imriegħed ninżel f’ilmijietek nodfa.
Gurbell imsaħħar jien. Xewqan nesplora
l-irqajja’ mmakulati ta’ qigħanek.
Minn grieżem ħluq ċkejknin, fis-swied moħbija,
nar’hom u niggust’hom mibżuqa l-bżieżaq
t’ossiġnu mal-livelli tas-sepulkri
korallini. Bla ħoss dal-kompressuri
naturali, dal-qlub ma jafux b’għeja.
Dan Alla jerħi nifsu ’l fuq bil-għaġla
maħkum minn deni jikwi t’entużjażmu,
imgħaġġeb u eċċitat b’kull ħlejqa sbejħa
ta’ idejh, mit-tajn imsawra b’ġentilezza?
Tgħid b’dawn titfewwaħ l-alka ħamranija
u ġmiel il-qiegħ jitkattar kull sekonda?
Ir-ramel disinjat sa fl-aħħar nilħaq
b’subgħajja jħufu f’kesħet l-agħma dwarhom.
Il-ħass mill-ferq u l-bjuda ta’ liwjietek
u s-sħana miċ-ċagħqiet jitbandlu ħielsa
jgħaxxquni sħiħ. Bla naf, nimtedd, nitħeddel…
Jonsobni n-ngħas u nagħlaq dlonk għajnejja
u mmissek jekk int tmissni, j’ombra mferfxa,
u nħossok kif inħoss il-poeżija.
Hawn ninsa jien min jien u dan mhux sewwa.
Fi ħmuret l-għabex nidfen il-mistħija
li mlietli wiċċi dbabar lewn l-iskorfon
u nsalpa qajl lejn xefaq bla riflessi
ħa ngħib bħalma l-baħħâr magħruf tal-ħrafa.
Ma nwebblek qatt b’li juġa’, b’ħolmti lħiħa,
għax naf li taf, ta’ fommok balsamina,
li mħabbet ammirall hi klandestina.
|
