Louis Briffa

�

DJALOGU MA’ MULEJJA� �

Kemm xrobt dal-lejl! Ħitan u ornamenti
daqs skrun ta’ ħelikopter daru miegħi.
Suffetti mqammra bdew jagħfsuli ’l sidri,
jaqtgħuli nifsi u jien bqajt xorta ndaħħan
sigarri tqal, u nisħet, nogħxa u nixher.

�

Bil-ferħa lqajt mill-ewwel l-istedina
u tinsab hawn, maġenbi, fuq pultruna.
Jekk jaqbdek l-għatx, feel free, iftaħ l-armarju
u ferragħ kemm trid int: Ċinn Ċinn Mulejja.

Ma nafx x’għamilt u ’l min mort nafda ’l ħajti
biex sfatli kobba spag f’taħbila waħda.
F’idejk tħollhiex, tqasqasx l-għoqiedi spissi
u tirvinaha. Ma nafx ngħidlek mnejn tibda.
Naf biss li dnibt u d-dnub kien l-ikreh dagħwa
li nqatgħet minn ġo fija.

“Iqantar dnubek, taf… Dnubek, poeta?
Tgħaddih in-nhar fi kmajra toħlom waħdek
u l-lejl ixettel f’qalbek xewqat oħra.
Tgħakkist u milt bit-toqol ta’ ħaddieħor
u lanqas għadek taf tislet tbissima.
� ejt adottat mil-lejl u tliftli għaqlek.
Xufftejk birdulek, moħħok ħfief bħall-weraq
f’dirgħajn ħarifa mżarġna f’kuda griża.
U griż ukoll il-kliem li tħażżeż b’rabja
biex bih tisfuma l-għodwa li xejħitek.
M’għadekx iżżurni f’naqra ta’ kappella
u taqta’ minn għajnejk demgħa ta’ ndiema.
Fejn mar daż-żmien? Fejn ħarbu t-tfal ta’ mparek?
X’sar minnha l-wegħda kbira li għamiltli?
Int tlaqtni waħdi f’rokna mmut bil-kesħa
kif waħdek int illum taqbad bis-sħana
ta’ l-absint u l-likuri jħammġu fwiedek.
Biex issa nfnejt u rasek milt fuq sidri…
Għax meta qalbek qtajt m’għajjatlix għajta
u ’l wiċċi ma fittixtx fid-dell ta’ sħaba.
Kull dmir għalik sar madmad. Kulħadd spiċċa
u kollox ma sar xejn għalik, poeta.”

Ma nafx xi tkun, Mulej li tista’ kollox,
jekk din tal-lejla mhix xi ċajta goffa.
‘Kk insejt lilek u ’l niesi, lili nnifsi,
dan mhux b’kapriċċ. Talent jeħtieġ jitħaddem.

“Talent il-fantasija u jien tajthulek
biex int tużah u tħaddmu kif jidhirlek.
Imm’int m’għaraftx il-kobor ta’ din l-għotja,
u bqajt issus u tiġri għal teżori
li mingħalik b’kapriċċ ċaħħadtek minnhom.”

Ma tlabthilekx, ja Sidi, il-poeżija.
Mill-bidu żrajtha fija. Jekk jidhirlek
li trid teħodha lura, hawn hi, ħudha.
B’kastig aqfilha f’ċella għal għomorha.
Minn hemm ma titniffisx. Bil-mod ninsieha.

U lili – spirtu minsi u mingħajr isem -
ibdilni mqar f’insett jibża’ min-nida
ħa ngħix fil-labirint ta’ fjura mbandla -
ċensier fi rjieħ li tqanqal biex titqaddes!

GABRIJEL JISIMNI

F’adorazzjoni,
mitnija sserraħ minkbek,
bejn fergħa dawl u dlam,
niftakar, sibtek…

Kont eċċitat, Marija…
� wenħajja mingħajr sabar
ma’ l-ixfra ta’ ħitan il-laqx ħakkejthom;
u l-kmajra b’riħa ħelwa ta’ żgħożija
inksiet bl-irxiex tad-dija.
B’hekk int inħsadt
u rsaqt passejn lilhinn…
Sellimtlek kont.
Tiftakar?

Kienx loġiku għalik
il-kliem li bih wassaltlek il-messaġġ,
int tista’ tgħidu llum,
bla ħjiel ta’ biża’.

Enfasizzajtx iżżejjed
il-pass meħud minn Sidi…
Kontx doċli, werwirtekx…
sa qgħadt narak ittegħemha,
tassaġġaha…

Ngħiduha kif inhi:
Propost’allija kienet! Ragħda
li ferqet moħħok tari…

Għalija
kien privileġġ tremend,
fiduċja għamja,
ġenn ta’ ħlewwiet smewwija…

Għalik
rigal tal-ħolm,
bixkilla grazzji
u ħodon ġieħ, barkiet…
bla mistennija –
għax int bla pretensjoni kont u tibqa’!

B’ilsien misnun mal-mejlaq ta’ l-etern
kont wassalthielek
l-aħbar,
sbejħa Marija.

Kien univers ta’ mħabba
marsus f’niskata kliem
li fewwaħ b’mod mistur it-tabernaklu
ta’ ġufek mingħajr ħtija.

Kont ili nħuf u nferfer
fil-bur tal-fantasija…

’Mma qatt ma ħsibtha din…
Li nkun l-akbar ħabbâr!

�

GĦAX JIEN UKOLL BĦAL KEFAS U S-SULDAT�

Tgħid x’kien li ġejt mal-folla llum insibek,
f’taħbila liema bħalha, ’mma ħerqan
li nressaq ma’ xufftejja l-isbaħ kalċi� � �
iqattar redenzjoni u serħan?

Għajnejk fehmuni l-kobor tal-misteru
u l-ġenn ta’ mħabba fl-akbar kmandament.
Għajnejk fehmuni l-waħx ta’ dil-passjoni,
l-imrar, is-swat, il-qerq tat-tradiment.

Madwarna l-ward, il-ġiżi, l-kriżantemi…
ir-riħa ta’ l-inċens mid-damask vjola,
l-altari mnażżgħa f’dawl lampier il-wegħda,
id-diqa fl-uċuħ sofor bl-awreola.

U ’l ruħi nħossha mqanqla għat-tisfija -
għax jien ukoll billejt il-ħobż fil-platt,
għax jien ukoll xewwixt, tajt xhieda falza,
għax jien ukoll mal-folla kont għajjatt.

Għax jien ukoll insiġtlek il-kuruna
u tajtek f’idek xettru bħal sultan,
żeffintek bejn l-irjus, imm’int bqajt sieket,
ma tħassartekx u bsart li kont beżgħan.

Għax jien ukoll fil-mixja stramba tiegħek
lejn il-Qorriegħa żidtlek ħafna ħotob,
waqqajtek tliet darbiet u mbagħad bil-frosta
ċaqċaqtlek bħal miġnun fuq ħaddejk rotob.

Għax jien ukoll middejtek fuq dik l-għuda
u ftaħtlek pwieni ġodda bit-tismir,
id-dadi xħett għat-tunika qaddisa,
u sqejtek ħall, minflok inbid, b’ardir.

Għax jien ukoll ma’ l-aħħar għajta mħarħra
infidtek b’lanza ’l ġew f’ġenbek divin…
U għadu d-demm,� u għadu l-ilma nieżel,
għalkemm, sa llum, għaddew is-snin u s-snin.
Għax jien għalik � ud’ieħor, xhieda falza,
kuruna xewk u frosta ġejja u sejra,
il-ġenn ta’ solitudni fl-aqqal siegħa,
u dada tiżfen fl-art u oħra mxejra.� � �

Ja Kristu mdemmem, niedem ħriġt insibek…
Għax jien ukoll bħal Kefas u s-suldat
mifxul u mbikki għarkubbtejh quddiemek
maħsul bid-demm u l-ilma tal-kustat.